The Poet's Courtyard

سالا لكلام

سالينا من ذاك الضيم والتخمام

بل منك ومن امثالك

ياك لي في راسك هو بلانك

ذبحت الرحمة وسالا السلام

وهي لأيام

دابا توريك حر الحسرة

خميرة فطيرة والطريق عثرة

سواكك رماد و تخمام

دابا ذاك لقفيز يجي لوقت ؤ يحيد

ما ينفعك حسابك ولي عندك ف لمزود

ما يضمن ليك راحة ولا سلام

معاك تقاضى لكلام

شاطا ماطا ب لوراق

دفوع كبير وزواق

والعشرة عادت حنظل وسقام

راكبة عليه ملاطي

اش دير بجثة خاوية غ تتقاقي

راس مالها نفخة خاوية وهندام

كذب كذب تلفاق واتهام

واليوم الغافل ضربتو لفيقة ؤفاق من لمنام

ضاق ؤ شداتو الضيقة

زدتي لقلب غ الم وحريقة

سرك استئصال من الجدر ...

فما عدت غير موكة في الظلام

ياك ارض الله واسعة وكبيرة

اش بيني ؤ بينك الى ما كانت الرحمة والطيبة

صداع الراس ؤ لسانك خاصو لجام

لايام هي لي غادة تعرف ك تقطع ذيلك

قلة الصفا ؤ طريقي ماشي طريقك

ؤهاذي نهاية لبداية ...

لي كانت بهوت وكذوب واوهام

سالينا

تكشفات الحقيقة و سدينا

الزيادة من راس لحمق ...

إلى كانت بالضر رجعات ؤ صيام

حتى الصبر طال عيا ؤ مل...

حيت جيتي مهرسة الكلة من الاول

عاضة في البزولة والمخ مروبل

بان ليك لحيط قصير بطيبتو...

دستيه ؤ م حشمتي م قلت حرام

تسالا لكلام

فكل كيال عندو زرعو

الاصل ولوقر نْقي هو ضرعو

ؤ م رضعتي غ حليب ذياب ؤ لخصام

فيا العالي بالصدق توجهت ليك

انت الكامل القادر على ذاك ؤ ذيك

زين حياتي بالنقا...

ؤ بعد بيني والجذام

سالا لكلام