The Poet's Courtyard

رابت الدار

رابت الدار

نخرها السوس

طبعو مسوس

ركب الهرس ...

شتت لجمع وزرع النار

عفط على الطيبة

نفسو عامرة قبح غريبة

راس مالو إفك ثرثار

لسانو ما يطرز ما يرتق

خدمتو مزق وفرق

مريض ...

ها الضغينة ها لبهوت غدار

ذاك العش الدافي عاد عوافي

كثارو عواصفو ؤ ماه ما عاد صافي

تخلوض ...

القيل والقال ولهنا بار

لعقلية مخزة بالانا والنرجسية

لجوف تصدى قتلاتو الكيدية

حرابي وحناش في لغار

رابت الدار

تسلطوا عليها الحسرافة

بدلوا عمادها خش وتبن نتافة

بعد القلب على القلب...

والأصيل تألم وحار

بنادم تخلق باش يهلك

يذبح نفسية خوه ويفرنك

قسات لقلوب ...

جمد لحس وبالشر فار

فشحال من بيت وبيت

خربتو لخملة وخزيت

تعرى لحضن الدافي ...

عاد لقريب بجهالتو مشرار

رابت الدار

كلها ؤ نيتو كلها وغايتو

سم بنادم والتشتات هوايتو

خربق حياة الصادقين ...

ؤ شيج باب الطيبة بالشوك والعار

رابت الدار

ل صانها الوافي بسنانو

وخا الضعف ما فرط رعاها بحنانو

تسلل الذيب مطلية بالدم نيابو...

نشر خبثو وطرق المسمار