The Poet's Courtyard

كروش لحرام

كروش جذام

ولفوا السحت

النًهب و الْخُبث

ما حشموا ...

ما قالوا حرام

لا رحمة لا إنسانية

ؤ ف دمهم...

سرات الهمجية

ولاًو عاهة وظلام

ما فكروا ف لمسكين

نسًاهم لمال ف لاخْرين

زادوا علاو...

غرقوا لفقير ف التخمام

كروش لحرام

ديما ديما رابحين

مناشر طالعين نازلين واكلين

وخا تكون الجايحة وسْقام

من جيب لمسكين يرقعوا

ؤ ل شكا بألف سبب يشرعوا

يبلع لسانو ؤ يعيش لَوْهام

صور مقيتة نهابة م تخاف الله

عراو عبادو ؤ م لغاو ب لغاه

نْهَب ؤ هْرب موضة

خلقوا الألم ؤراب الساس ؤلقام

كروش لحرام لقاوها سايبة

كبروا هُما والحالة رايبة

ظلم بعينيه هذا ...

ؤ تقاضى لكلام

كروش لحرام ولفوا الفابور

السلطة والمال والبق م يدور

كمشوا على كْل شيء ...

ؤ م خلاو غير لفقر...

والمرض و سْقام

كروش لحرام