The Poet's Courtyard

غَيًر

غَير ...

ذيك لعقلية لخامجة

راها في الروينة طاجة

صحصح معايا وفكر

يا حسرة راك اساس البناء

عمارة لبلاد زعما والنماء

لكن حلفتي تبقى طايش ...

وفي الزيرو مكور

تغير

تحمل المسؤولية والتزم

صفي تشرب حشم واحترم

عود سبع وزأر

ما بغينا سلالة تالفة

في الزحمة ناقصة جافلة

الموضة وبنادم مقهور ...

والذراع كَادي مطرطر

لا تقول هما سباب عيوبي

انت العلة والداء كذوبي

ما صنتي دورك ولبلاد ما نتجتي ...

غير الشوهة التلفة والمنكر

ما بزز عليك حد تعود عالة

ارى ارى طامة آش هاذ لحالة

ها لبولة الحمراء ها لكالة

عاق مو وبوه مسكر

بل مرفوع منصوب غادي

حتى في لغاه سوقي بوجادي

ما ترجل ...

مشبوه تحت المجهر

تغير

غسل مخك راه عامر خرافة

راكب عليه ملاطي ومكملها بالسخافة

اش هاذ لكرش ل ولدات ...

دايخ عاجبو غ يتلهى ويكركر

لمعقول ولحشمة لا تهدر عليها

السنطيحة ولهزان لخاوي بالتكبر يداويها

انتحار طبقي والراس مكور

ما بغى يسمع وصية ولا يقرا

اتكالي سلبي بلابلا ولهدرة

ما في شلو ما يبلو ...

مربوط بالخاوي ما قاشع ما مدبر

غير

طبع لعكز والعدمية والنكير

راك ما زرعتي باش تحصد القمح والشعير

بغيتي الحضيض ولقنات ...

وفي الواجب ديما راجع مسوخر

ما مسوق لوصية لاجداد داه لواد

خلى الغلة وجنى لخش ولعواد

ما في قاموسو غ السخافة مقصدر

فنوض يا لغافل حمي لأرض

دير النفس ؤ صون هلك وفي الهمة شد

راه بسبابك هجم الجراد

لقاك غافل لا نضج لا اوتاد

تسلح بالوطنية والإيمان...

ولذيك لعقلية طهر

غَيًر