The Poet's Courtyard

يَا جْحَا...

رُدْ بالِكْ يا جْحا منَ الرَجًة

وَاشْ ولد السْبع

بْحَال ولد النًعجة

طُلْ على ماضيك

وَتْلَمًسْ بيْديك الحُجًة

لَكْريمْ إِلَى كْرَمْتيهْ

حرامْ يَقْسى أوْ يَجْفَى

واللًئيمْ إِلَى اعتَبَرْتِيهْ

جَحًادْ للخيرِ عَقْلُو مَرجَة

اَه يا جحا...

سَوِلْ الأَيامْ وَالرْحَى

دابا تْدُورْ عْليكْ...

وَتْحَسْ بالرًجْفَة

باقي زايِد في هْبالِكْ

رَاكْ مخلوقْ ضلُوعُو عَوْجَة

الرُجْلَة يا صاحبي معقول

أخلاقْ وعِزًةُ القول

ماشي طيشْ وَطَجًة

او مراهقة طريقْها فَجًة...

وأفعال قاصِرْ طَاجًة

الرُجلة تضحيًة...

بالحلالْ والنية

وَصَهْد الحالْ

مرة عليك ومرة علي

مرًة ليكْ مرة ليً

ماشي بالَحْيالَة والضَجًة

رَجْليك يا جْحا في الغِيسْ

وأنْتَ دايِرْ فيها لقمان

زَعْما فاهِمْ لَحْساباتْ الرايجة

يا جْحا شَدْ الأرضْ

نْهارْ لِطِيحْ مَا تنهضْ

وَمَتْنفعكْ عَقْليًتكْ الْخَامجة

ما زَدْتِ بكذوبك وبهتانكْ

سِوى النًار وبانِتْ نيابك حادًة...

تْهَدِمْ بْروجَكْ لَحْروفْ لَمدَجًة

فِيقْ يا جْحا رَاكْ خاوي

بْلَبلا والنْهيقْ في لَقهاوي

دايِر فيها الرًايْسْ والراوي

نوضْ راجِعْ وْراقِكْ

راهَا في شط لَحْمومْ مايْجَة

رُدْ بالك ياجْحا

واشْ ولْدْ السْبَعْ

بْحالْ ولد النًعجة

طُلْ عْلَى ماضيك

وَتْلَمًسْ بيْديكْ الحُجًة...

إِنْهَب واظلَم واطْغَى كِ بْغيتي

فالعامِرْ في السْبُولْ حَاني...

والخاوي سَلْعتُهْ قاضْيَة حاجة