The Poet's Courtyard

وقت لحساب

لحساب ...

عاد عكاشة يا لفُسًاد

سمعة لبلاد

قيمة شعب وملك وامجاد

عار مقصود

حال مظلم منكود

أجندات الخونة ...

بيادق وحناش وكلاب

الفاشل يرد المنهوب ويتسخسخ

ما جلب غ الذل وسخ موسخ

ريب وهدم فرعن وفرشخ

مْلك لكرسي ....

وفي حانوت لحيالة دق لوتاد

وَرًث ذاك لمقام ل ولادو

ضمن الرفاه ليه ولحفادو

جمع وطوى وسد لباب

ما قاسا ما ضرب تمارة

كلشي فابور تريكة الشفارة

حط عشو في العالي ...

بحلاوة اللسان والتغرير نصاب

قمطوا بنادم في الذل والحيرة

عادت حريرتو قصص وروايات كثيرة

خْلاوها على لمخلوق...

ؤ ردوا طيور لأرض أغراب

جنس قصيف

زاحف على بطنو مسحور كفيف

ذاك سر ل تباع رخيص...

عاد شماتة ولبس جلد الذْياب

خلية الخبث والعمالة

بيادق لعدى ل خانوا الأمانة

لقوي مضى قبحو ...

ظفارو والأنياب

عاد حطاب

في رزق الغير ولفقير

بلابلا ولقنبولي والتسرير

نسى اصلو وقلب الصفة...

رجع فساد نكار كذاب

واليوم جاء وقت لحساب

ففينكم يا لعساسة

لغلاظ طغاو وعونوهم لبحلاسة

حولوا لوديان مالحة جافة

السهول على زريعتها تالفة

لغلة شوك ومحاين ومصايب

ما وْفاو ما صانوا عهد

زرعوا الحيرة والفقسة والنْكْد

طفاو شموع الأمل ...

وبالشوك سيج دربو طماع شلهاب

واليوم جا وقت لخبيط والدق

ينتصر الحق على الفساد والباطل يزهق

بانت الحقيقة وكبير الطحشة تورق

عاد في الخلعة يقاقي مرعوب ما مصدق

دابا سرو البركاسة ...

يذوق ويفهم آش دار لِ لَعْباد

لحساب