The Poet's Courtyard

نفس لخيار

نفس لخيار ...

ؤ ما فيهم ما تختار

ركبوا السلطة

القسوة والغلظة

ؤ بقاو هما السادة وصحاب لقرار

وخا سلات المهمة

بقاو داكين وتادهم تما

دوم ودفلى خش وعرعار

طلقوا عروق الخبث في الأرض

سقاو بنادم سم مكرهم وتزاد الصهد

ها الشناق ها النصاب وها السمسار

بحال بحال

نحثهم اللحظ طنازة

غدارة ف التدبير دبازة

كلها ؤرباعتو ؤكلهم ...

نفس لخيار

ؤ ل ما فيهم ما تختار

واش ماشي عار

يكون غطاك شوك وحلفة من جود الرعاوين

ذياب الغابة والعملاء والانتهازيين

فاقدين الملة فلا نيفو ولا غلة ولا شوار

بل عادوا على لهزيل عصابة

داروا لحمية ؤ داسوا صياح لغلابة

حكماء فقرون ...

لزرعوا التشلهيب ؤ خلاوها على الدوار

نفس لخيار

واخا لفضيحة ولفوا البزولة

القلب مصدي والنفوس معلولة

عاض على لكرسي بسنانو...

ؤ حلف لا تنحى فهو لقمان المغوار

بل عادوا وارثين لمقام لعالي

لا انتاج الا جيب لمخلوق ؤ بالعلالي

مخلوقات بهلوانية ...

ؤ سباب الردمة ولغلا لعافية والنار

فقست بيوضهم غ بالتشيطين

باتوا سراق تابعين سايبين...

بل قل عادوا مشاش وشمكارة الدوار

ونفس لخيار

لما فيهم ما تختار

باتو في سوق سيس شناقة وتجار

خالوا وحدهم ل كاينين

زعما الفاهمين القافزين

ركبوا جهل القطيع...

ؤ قطعوا فراحو وسعدو بالمنشار

بل عاد يبان ليهم ذاك وذاك

صوت وقنطرة ؤ تسلات الادوار

وسعوا الطبقية

باك صاحبي والعنصرية

عاد الجوف حاقد بركان غضبة ونار

نفس لخيار

ما بقى فيهم ما يليق

صداع الجيب والغمة ولحريق

بينا وبينهم مسافة...

فلا قناعة ولا اختيار

ؤحسن بعادهم يفرج لحال

تحيد لغمة والالم والسؤال

تهنا بلاد ؤ يفتح السبول والنوار