The Poet's Courtyard

كون بنادم

كون بنادم

مصحصح ناضج فاهم

يحترم باش يتحتارم

ما ترمي حد بدونية

تسخر منو وانت سخرية

جاليك لحال

مريض واهم

بل ما تشوف في حد بالعين الناقصة

ذيك صورتك انت على نقصك راقصة

لهزان ولغا السوق ...

وفي كَلثة لقبح عايم

خلي كلها ؤ طبعو ؤ كلها وحياتو

خلق الله هكا مشكل والتبرقيق فوتو

شوف شكون انت ...

تقدر لعيوب طلياك ب لعرارم

لا تهين لا تقول انا حادق نزق

عبر قياسك ؤ عنداك تبقى غافل حمق

ملتو ضرب هذا بهذا...

منشار واكل في لحم الناس ظالم

رخيص ما عاد يسوى والو

سومتو نقاه كلمتو وافعالو

لمروة ولوقر والطيبة راس مالو

فرط عاد طايش مراهق...

مخطوف وفي التلفة للخير رادم

كون بنادم

بغي الناس بلا حساب

سوي ما كاين غريب كلشي حباب

ما تركب ضعف ووهم لغير...

ؤ ف الرجلة لا تساوم

كون بنادم

لا تكون طامة

شد وقرك راقب نفسك السامة

رجع عوينة ؤ سقي الفرحة ...

احترم الانسان ورسا يا الفاهم

كون بنادم