The Poet's Courtyard

البوق

بوق

ولوجه قاسح محروق

تخلق باش ينهق رخيص

يولي ف قياس بوط

ضاربو زعطوط

ممسوخ عاد ممحوط

ؤتحت قدام مول الريال...

دفة محطوط

باع القسم والرسالة

غدار خان الله والامانة

شراه فاسد ملهوط

صبح عندو يتَرًس

قدامو يذوب م يتنفس

ؤ ب لكذوب غرر بالمزلوط

باع لقلم

ما بقى يخمم او يحشم

مات فيه الحس مخروط

بوق

قرا باش يولي شناق

يشهد الزور وهو عامر نفاق

في سوق الغفلة تباع...

عمروا عقلو صيكوك

ستر سراق الليل

عاد جزمة م يجيب غ الويل

دبلجوه وولى كرموسو عنطوط

ابواق في الصندوق

هذا ترامى على الملة والدين

وهذا بغانا اهل لوط الفاسدين

ولآخر بغاها غابة فيها تالفين

فتنة تشبكت وتعرمت فيها لخيوط

ما عندها حتى مخرج

سوى المرج والهرج

عقلية مثقوبة ولشعيل لعوافي محطوط

بوق

رجع راه باقي لحال

حيد ذاك التشلهيب ؤدير البال

م يدوم غ الصح لا مال ولا زفوط

بل م تخون لوح مخطوط

كون سبع وزأر

بلا حيالة بلا غدر

فضح الطاغي والفاسد والملهوط

فوت عرض الناس

لا تعيش مبيوع خماس

تنور لبلاد

يفرحو لعباد

ؤيتفك من قيدو ذاك الحق المشنوق

بل يفرح المظلوم ...

ؤ في العز والشان يعيش المزلوط

بوق