The Poet's Courtyard

وْسَخ الدنيا

هو وسخ اللحظ يبقى فيه

فكيٌت ل باع آخرتو عليه

م صدًق م زكًى

ؤ من عرق لمسكين شبع ؤ تسلى

تبع زواق ؤ ل ليه ما كان ليه

شحال من طماع ب لحرام عشى ولادو

زرع بواقة رد السحت زادو

غراتو دنيا ؤ باللهفة تسدو عينيه

بغا يعيش لفخفخة غ هو

ضيع ملقاه ؤ خْسَر كلْ مْروة

استعبد لمسكين ؤ ضحك عليه

م ناعس م فايق

عادت النخالة قوتو ؤ لحرايق

خايف من لموت لَ تديه

م عندو باش يلقى الله

غ القطاعة لِ خلًى وراه

غدا يعياو منو...

ؤ للملجأ يديوه

لغافل قال ندير ؤ ندير

اليوم قلًتْ صحتو والجمع تفرق عليه

راسي ي راسي حكمة الوقت

ؤ ل جمعو م ينفعو هنا ؤ لَ لْهيه

ففيق أبنادم ؤ من عرقك عيش

لقرش لحلال م يريب م يعلم لفيش

الباقيات الصالحات

ماشي لِ تنوض الحيحة فِ عشاتو

على لِ خلاً ولا من يترحم عليه

فاسمع يا ذاك الإنسان

م تعاند فلان لا سي ترتلان

ف ل علفو الجمل ف الحدرة

يحطو ؤ بالسلامة عليه

م تاكل حرام

راه غ السحت ؤ جدام

زواق يطير أ بن عمي...

ؤ لغد مالك نسيه

لقنعة كنزة م تفنى

كرمة ب دعاوي لخير ثمرة

علم هلك البساطة

بالعلم م يعيش شياطة

ؤ ب لحرام لا تطعميه

خليه عليك نقي

ؤ ف ذيك السيرة لا تدوي

ؤ على حب الخير ربيه

فوسخ الحال محال ؤ يبقى فيه