15 أبريل 2023
خوات القفة
خوات القفة
عادت من الدار خارجة مهووسة
خايفة من لغلا مكمشة منكوسة
خواها زعطوط الشناقة و الهرفة
دار لراسو مخرج ؤعلى لفقير زير
جوع بنادم باش يعيش هو مخير
قليل لمروة والأصل والعفة
مات فيه لحس مجلخ ؤعاد مطيار
موسخ بدعاوي لبلا مشرار
ؤساهل يبيع لبلاد...
الا لقى الهوتة والغفلة
بالصدفة
طلعناه من الضيق و الحفرة
جامي شبع فيه الجوع نعرة
لا حشمة ولا قنعة
طرق الباب ؤسد الدفة
عاد من مترفيها وتجار الأزمة
لوى للسبع دراعو ؤ ربط النور بحبال الغمة
فرعن ؤ ما كان غير قزم وجلفة
خوات القفة
عاد بنادم وحدو داوي
عيا من شحال هذي جيبو خاوي
سرق منو شناق الفرحة وردو ظلفة
قسا ولضوء الفرحة طفا
فقد حس بنادم
بعرق الناس ولى مفطح غانم
ذميم عاد ؤدفلى
يصحاب لو دار لمزية
ظن راسو فيها خالد ونسى المنية
ؤ ما هو غ ماعون شوك غارق في الخوف والرجفة
ما بقى عندو قلب ولا احساس
من لحفرة عاد سيد ؤعلى الحق داس
بغاها فتنة ؤ نركبو حنا لكلخة
خوات لقفة
سبابها واحد عايش فابور
السلطة والمال وللكلب شيفور
طغا ؤ عفس على الدرويش عفسة
تغناو ؤ زادوا تغناو
زلطة والجوع هي لي بغاو
ونساو انهم في ورطة ورجفة
خوات لقفة
الأديب والشاعر المغربي الأستاذ أحمد الكندودي
15 أبريل 2023