The Poet's Courtyard

دير خطوة

راه لوبي الشناقة تْقوًى

عاد حْنش ...

وعلى عنق لهزيل ساير يتلوى

خطف ما خلُى

غ لغمة ولْعَلًة

ماركة بلا صلاحية

انانية انتهازية

كَدات لعوافي ...

زيد زيد ولخونة

صياد لأزمات

همو يَسْمان وَرْيالات

موت انت او تْشوًى

لوبي لفساد كبر

صنع دوالْبو وتجبر

عاد لحاكم وهدرتو لولى

بل زاد للسارق دعم فاغنم

عرًى الدرويش وكَاع م حشم

مال الميزان بثقلو...

رد الظلم والطغيان نشوة

ما مسوق ولعساسة ليه عوين

حاميها حراميها والنفعيين

خلاوها على لبلاد ولعباد ...

حلوا السحت والشهوة

ؤ حيث الحاضي الله

تعفرتوا طغاو ؤ ما خشاوه

زندوا جمرهم ...

غلاو حتى كْرَمْ صْياح وَلْوى

بل باش غابوا صحاب الحال

فرعن الطماع والجمٌال

صنعوا صوارخ الحكرة والسيبة ...

لا قناعة لا مروة

ما خاصهم غير تسييقة

ترجع لأمور لمجراها والثقة

يعيش الحر بعزو والنخوة

الأمر بسيط وحلو ساهل

من أين لك هذا ولغرابل

الصرامة والتًقوى

تسود العدالة واللحمة

لخير ولهنا ملحة

ترجع قيمة مول لقلم والصفوة

ف ربط تلقى ما تطلق

رد البال لغدار غدار فَدَقًق

ذياب لغابة ...

راها إيلا شبعات...

عْلِيً وعليك غدا تتلوى

فدير الخطوة