The Poet's Courtyard

علاش

علاش ...

حنا هكا علاش

قتلنا بغنانا الفرحة

الانانية باتت علة وقرحة

راسي يا راسي ولفلاش

علاش

ما زرعنا غ لحقد والتلاوي

بحال بحال لغني ؤمول جيب لخاوي

سكنتنا الغفلة ؤ ما طفرنهاش

كلشي غ بالتكماش

ما تقول غير بوبريص عساس

لا نضج لا خير لا كناش

علاش

ردينا لكذوب ولبهوت موضة

مات الحب ؤ ردوه اعجوبة

عدنا جراتل مشاش

لوفا عاد سوقو خاوي

لمعقول لبسوه لهمج كل لاوي

عاد الود منة ...

وبالقيح عمر الكاس

شي يدوس شي والغرور راكبو

ؤ شي يفترس شي وقلوبنا عابو

ضيعنا لخاوة والنقاء...

ؤ عاد طبعنا افتراش

فعلاش

تدي حقك هذا وتعطيه لهذا

تجازي الحر بالصهدة ك العادة

حيت بوطونات الدماغ...

ما خدماش

حتى لعدالة وسختها يد شناق

باع وشرى ونشر الزنا والشقاق

غرقت السفينة ...

والحق نهبوه شي ناس

بل فصلو خريف ؤ سالا

خلى الخبث وصية ورسالة

ؤ دكَول حاجة ....

هاذ السياسة ما خرمزتهاش

جامعة تجار لغا

ورثوا لكراسي والسلطة والثروة

خانوا لبلاد ...

عاونوا على الظلم والترياش

علاش

ما نكونو حتى حنا بنادم

بالحق والعدل والصدق نحصلو الحاصل

ؤ ل تضرني تضرك ...

وبالمحبة ما نديروهاش

ذوك لاخرين ما فايتينا بوالو

نجحو حيت بالمعقول صالوا ؤجالوا

ؤ حنا حتى على مبطلات الوضوء...

ما تفهمناش

كلها ؤ رايو كلها ؤ قرايتو

كلها وسنطيحتو كلها وعياقتو

كلشي بغى يعود سي السيد ابو الفياش

ؤ باش يحقق لحلم والمقام...

يريش خوه احسن ترياش

علاش

ما تجمعنا المحبة ولخير

يد وحدة على كل غلاب شرير

تزهر لمحبة ...

ؤ ما تبقى بغضاء ولا فياش

علاش ؟