The Poet's Courtyard

وجلية تحت عنوان:

لوصية

لباب ل تدخلك منو الريح

سدو واستريح

ما تعمر راسك بِ مْغازل

ؤ لَ تيق ف سنان لقْراشل

تعيش معلول جْريح

او يلبسك الظن والوسواس

يتهدم حُمًارك ؤ يريب الساس

ؤ في هَوْتة التلفة تغرق ؤ تسيح

مليح تخمم ؤ تكون فايق فصيح

ضع النقط على الحروف

ذاك التردد حيدو والخوف

تضمن راحة البال ...

ؤ تداوي لقلب من كل قبيح

فالباب ل يجيك منو الريح

سدو اصاحبي واستريح

على الجيفة م تربي كبدة

بغي راسك هو لأول بعدا

دير الهم في الشبكة...

شي يبقى ؤ شي يطيح

احساس بالذنب لا تفكر فيه

حِيت م رضتي حد مد ليك يديه

تدير لي ديرتي ...

ؤ ف الأخير م يكر ؤ تصيح

فكر في سعادتك ؤ حَب راسك

حر أنت ف خليلك ؤُ ناسك

بنادم رمانة غامضة ...

ها الخامج ها الصحيح

الباب ل تجيك منو الريح

سدو ؤبعد من الضجة والنبيح

اللهطة ؤ لهفة لقرودة

اختار راه الصهدة ماشي هي لبرودة

نتف نتف ؤحليب الدم ؤ لقيح

ما تسنى حد يعترف بقيمتك

عرفها وحدك باش تثمر غلتك

ؤ مولاها م ينكد م يشيخ

ؤذوك ثقابي ما تحاديهم م تهبشهم

فيخرجو ليك لحناش يسقيوك سمهم

شد مربطك ؤ ميز...

بين الكرعة والبطيخ

حْكَم فمك عْبَر كلامك

راه ماشي كلشي هلك وحبابك

ربط لسانك ؤ م تخليه يطج ...

لادع قبيح

راه م يجبد ليك غ لعداوة

وخا بالطيبة موسوم ؤطراوة

صفي تشرب والقلب سميح

ؤ لباب ل يدخل ليك منو الريح

سدو اصاحبي واستريح