The Poet's Courtyard

شد ولدك حداك

شد ولدك حداك

خاويه وكون رفيقو

لا تكون عثرة في طريقو

وياك وياك

دنيا كلها مسالك

مظلمة والداخل ليها هالك

تجني على كبدتك ...

او ترمي شكاه وراك

شد ولد حداك

ما تسلمو لليد لغريبة

زعما راه غطى وطيبة

ؤ ما تيق في حد هذا زمان لهلاك

لمدرستو رافقو

بالحقيقة ديما صدقوا

كون القدوة وتنقى عفاك

لفراغ دار شلة بلاوي

هدم لولاد وهد لكبادي

زادت نار العافية ورمادها سواك

عاونو وفي وجهو تبسم

راه محتاج ليك ماشي للدراهم

يلقى فيك البو والصاحب وهو حداك

شد ولدك حداك

دعاة القبح فقست بيوضها

في الزناقي المكبوثة سايلة ريوقها

ها البيدوفيل ها لمكبوث ها الأفاك

لحرية ديرها طابع

لا تنسى الحشمة وصلاة الجامع

وريه طريقو ونهار يزهر يكمل رجاك

ما تعرضو لضياع

ياكلوه لقرودة والضباع

قلوب لحجر ولسان حلو عراك

اش تسوى الى عاونتيه على الدونية

شغلتك الدنيا جمع والمتعة والبهيمية

ولكبادي تايهة غريبة ولداخل منهاك

فشد ولدك حداك

علموا الرجلة والتوكل وياك وياك

من ثقافة لفشوش

الدري يكبر مغشوش

ساهل للطيحة ؤ م يلقى سلاك

على لغد كافح وجاهد

ما يهمك حد واظب وكابد

زريعة الصالحة غايتك ومناك

شد ولدك حداك