The Poet's Courtyard

مولى نوبة

جاتك فيك يا شفيفير النوبة

عكاشة والتوبة

كنت من جران الكَلتة

نهب ؤ عفط على الضعيف عفطة

فقر مول لقلم ولكتوبة

اكذوبة

خدمة الصالح العام

بنادم في الفابور عوام

سرو الربيط في الزريبة

لبستي جلدة التمساح

نسيتي الخير والصلاح

عدتي كبير دْيوبة

واليوم جاتك النوبة

ؤغدا هذاك ؤذاك لعيوبة

لحال حايل ما يدوم

كل طاغي لا بد ما يسالي مهدوم

سلات غْرَيْبة يا لمجحوم

تفطاح من جيب الطبقة لمغلوبة

وانت وانت وانتما

دابا تذوقو حر الدفلى

لخلعة ولماء ف رْكابي والطيحة

تديروا رقصت المجذوبة

ذيك ل شدوها عزارا الدوار

سارقة حق لغير ؤزرعت لعار

ؤ ب تخرميزها ضاق الحال ...

عادت لفرحة مسلوبة

يا مولى نوبة

فينكم طلوا او خايفين من الرحى

تطحنكم ؤ ترجعوا طينة موسخة

ربي مْهل وما هْمل فتسناو النوبة

شحال من شفار غ بالهندام

لاخر بالاشارة ؤباك صاحبي خدام

ؤ لاخر دار لبوز ؤركب العين لمعصوبة

ما وقر حد

خان الوعد والعهد

عاد قارون زمانو ولوجوه مندوبة

دابا توصلو النوبة

عكاشة والتوبة

ما خفتي ربي ما حشمتي

هرستي مدرستي ولولادها جهلتي

شي عايش دايخ ...

ؤ شي في الركاني والدروبة

ما شفقتي ما حنتي

ما قلت حشومة ؤ لا ندمتي

ركبتي لموجة لمقلوبة

ردتي للجاهل فيها شان

مول لحكمة هرب عماتو لميوعة وصْنان

اجواف وانفس عَفْنة ولعقلية مثقوبة

تخلق باش يسرق

ما خلا البق منين يزهق

ولًى سي السيد ؤ نسى لحصيرة لمثقوبة

ما شد لارض دار جناح ؤبغا يطير

ظنها ليه دايما وجهو قصدير

ؤصياد نعامة ايامو باينة محسوبة

واليوم جات فيك النوبة

ؤ انت يا لتابعو...

وقف نيشان ياك وجهك بايعو

غ وجد ، فالخطبة اوقاتها معدودة

بلا ما تهز وتجبد

راك ما تسوى معنطط

شوهة ؤ غدا في عكاشة شاد النوبة

يا مولى نوبة