3 يونيو 2023
مال الميزان
مال الميزان
شاخ ؤ عاد غِ تيخرف...
ساير مفضوح عريان
لحال عاد ليل بهيم يخوف
عقلية القطيع لخواض وصنان
ؤبين نجوم الدنيا راه ما يشرف
تمييز وميز وحرمان
مال الميزان يا فلان
شي مكسي ؤشي عريان
ها الظلم ها الطغيان
حجاية عفا الله عما سلف...
ؤصغير السراق يدفع الثمان
ذاك لي جهلوه ؤفي النقص رماوه
ماشي لخطروا هما لي بلاوه
ضيعوه في لعلم والصحة والامان
شي وجوه ركبوا عليه ملاطي
بغاو يورثو زعامة والله هو العاطي
حشوا بمناجلهم ورد السهول والنعمان
خالوا نفوسهم تولدوا يبقاو قادة
يورثوا ولادهم ؤ حنا نصفقو يا سادة
المال والسلطة غرهم ؤباعوا الانسان
مال الميزان
لبسيط عاد محقور ماد ليدين
زعما رحموه وهما لدمو ناهبين
تحراميات لخبث وجهالة ولغنان
مال الميزان
زادت الهوة والطبقية
ما كاين غير نتعلا عليك تعلا علي
المال لعام والمخلوق مزلوط جوعان
سدوا كاع لبواب
بغاو كلشي سعاي وشطاب
ينظف خنزهم وينقي لمكان
ما بغاو يزاحمهم واعي
حبو الجهل والخرافة والتلاوي
خوات الجعبة ؤبنادم في فقرو حيران
ما بقى يهمو اش تيطرا في لعلالي
قهروه ؤ ب لغلا داسوه ؤ بالعلالي
سكت سكتة ؤرضا ب لكان
عاد همو في بطنو
يضحك ليوم لغد يهجرو
عصابة الخطفة قلال لامان
مال الميزان
عاد لمعقول وصفا مذمة
تصدق لكذاب زاد لحظ غمة
فنوض صون بلادك...
من دعاة الزلطة وحلف الشيطان
الأديب والشاعر المغربي الأستاذ أحمد الكندودي
القصيدة السابقة
حط راسك فين تلقاهالقصيدة اللاحقة
شريعة عشق3 يونيو 2023