11 يوليوز 2022
لعرق الحار
لعرق لحار
وخا تسقيه بالطيبة
يسقيك أذى وضرار
حالتو قصص غريبة
قلة الصفا ذميم مشرار
بالمخيط يغرز كل عجيبة
عاض لبزولة لا حشمة لا تيقار
اه يا الدنيا الهايفة بحال زريبة
مال سماك فتنة وعجاج ؤغبار
مصيبة تبرا فتنبت مصيبة
لقلب رشا ؤقطعوه بالمنشار
هاذ الدنيا عادت يا صاح صعيبة
ولد الناس فيها م يسعد غ لأكدار
بنو رهطين ملتهم قصبة ؤسبيبة
ؤ لي كبرتي به يعضك حيت نكار
قالوا الصبر دواه ؤ غ كذيبة
م يزيد غ يحك عل الدبرة ب لحجار
علة صابتك ؤم ينفع طبيب او طبيبة
ساحت على ضفافو الملحة والعار
ربي اش هاذ لعجب ؤهاذ الخيبة
لا زهر ضحك ؤلا فتحت أزهار
لعرق الحار
دافع كبير طباعو غيبة
ؤ ب لسانو سمم فرحة النوار
قبيح السريرة م يفهم الطيبة
الراس كدية عامر حجر ؤمزرار
لعرق لحار
م وعى م فهم بغاها سيبة
ينوض عليك النحل قيمتو نكار
ضرب هذا بهذا شرورو قريبة
ما حرثي بالنية ؤجدرك دفلى حار
الأديب والشاعر المغربي الأستاذ أحمد الكندودي
القصيدة السابقة
العجبالقصيدة اللاحقة
رسالتي الى كل متقاعد11 يوليوز 2022