The Poet's Courtyard

لا تطغى

لا تطغى

ايلا عطاك الله فقنع ؤ رسا

حمدو وشكرو الف مرة ومرة

فافهم أصاحبي لغايا وروى

لا تتلوى

تعود مرهط حنش

على بطنو يزحف موسخ مخرشش

زمان السنطيحة ل بالشوك مفرش

لوجه لقاسح التلفة والرجفة

عنداك صباغتك تذبال

وسط حفاري الغفلة وظلام الحال

تقيسك عوافي الظن وتزيدك علة

ففيق ووعى

لا تطغى

لا ترامى على ضوء الكمرة

ما تكون حطب للشر ولا جمرة

ترزن ومن لحال رد لبال ...

صحصح وصحا

وانت غادي حسن زرع الخير

يعود ذاك الأثر ربيع وقمح وشعير

فلو كانت تدوم ...

ما توصل ليك ألبلا

بل نقي ذيك النفس الطايشة

راها ولفت لحرام وفي خنزو غاطسة

ترطاب لقلوب لكارمة ...

لِ عشعشت فيها الخملة

حتى لمخ على الانانية تبرمج

السادية والملة حطم صبغ ودربز

غاب هلال الفرحة ...

والخاطر ضاق وعيا

لا تطغى

قرا الجاية وزين مقامك

دنيا فانية ؤ ما ينفعك غدا عُرامك

تعود مجلي وتفقد الموري وضوك يطفى

لهزيل صون حقو ووقرو

لا تتكبر فتزيد ثقل ظهرو

تولي وحش ما في دواخلو رحمة

بل خاف من الخالق واحسن للغير

شد في الله لا تكون نكار شرير

لا سلطة لا مال دايمين...

ؤ ما تدي معاك غدا غ كفن واللعنة

لا تطغى

تواضع ؤ عنداك تنسى اهلك وناسك

ؤ ل عطاك الله خمم ؤ عبر قياسك

الدنيا لعابة ...

والدوام للعالي مول القدرة

لا تطغى

لا تقول انا صعصع الكامل

تدوس لحق وبالصدمة تسقي السائل

طهر دواخلك وتقاد ...

وعنداك تديك الحملة

لا تطغى