The Poet's Courtyard

دابا ترجع الفرحة

يا الواهم

ويا لِ وضع فيك المهموم...

الثقة وخا م اختار

وقال عليك تقدر تكون رجل مِخيار

اليوم خَرًجت نيابك....

ؤوليتي جنس مطيار

ذبال الوقر لفيك

ظلاًم ونهًاب وليتي....

جزار وسمسار

زرعتي شرورك ...

وحرقت لأزهار والنوار

زرعتي سمومك ...

في البلاد والدار والدوار

نهار لي اعتبرتي...

القلم والحرف عار

بل زرعت شرورك ...

حتى ولى الجهل طريق ومشوار

كبار لعقول تهمشوا ...

ؤ ف زمان الذلة ولاو صغار

والضِباع لي كانوا البارح...

عادوا سبوعة ؤ صحاب جاه وقرار

زرعت شرورك ...

وكوى الاخ خوه بالنار

مشات لمروة..

وبنادم ولى معبس مشرار

تَطَوُر زعما...

وهو مسكين غارق في غار

سرقتي فراحو...عمقتي جراحو

طفيت الامل بلا شوار

ؤ السعد دار جناح وطار

غطى غمامو كل قرية ودوار

ندبت العزبة ...

اختار العزري الغربة...

هاجرت البلابل لوكار

حتى ولد هاد الجار

وذاك الجار ...

هداو حياتهم عرسان. للبحار

بسبب قلة ما يدار

اه ...يالغذار...

اه...شحال غريتي بكلامك..

الشرفاء الأحرار.

فاسد انت ونكار

كليتي حق الدرويش

حرمتيه عزة العيش

وفمك مازال محلب...

لقتل بسمة الصغار

بشرورك ولات الحرة...

حوامة ؤمن دار لدار

زرعتي شرورك ...

وكلاو الضعاف بعضهم بالجهار

غادي يجي نهارك

تحاسبك أنفاسك،فالزمن دوًار

فيا بلادي...

همك ضرني ف فؤادي

تسلطو عليك الاشرار

قسموا الحلاوة والكعكة بناتهم

وخلاو لأولادك العلقم الحار

فيا بلادي...لا تحزني لا تتالمي....

وراءك السادس سيد الكبار

دابا ترجع الفرحة ...

ؤ يتحاسب كل سايب شفار