The Poet's Courtyard

باركا عليك

باركا عليك

ما لك ما قنعتي ...

ما شبعتي ما عيتي

وغير خوي ؤلهلا يهديك

كرشك كبيرة

تكستي وحدك الحبة كثيرة

ضرب هذا بهذي ...

والواد لحامل غادي بك

باركا عليك

من التشلهيب وحب الكرسي

زعيم زعما لكذوب والفرشي

هدمت حق ما هو ليك

بل ضيعتي على الريحان الفرحة

انت تمرحتي وسقتي لغير قرحة

ما فقتي ما عقتي ...

زايد فيه السنطيحة والتصعليك

لفاشل وهاوي الفابور ما يليق

باع راسو ؤصفق للمصلحة والنهيق

ضاحكة عليه الدنيا عور...

ما صفى ما نتج التشلهيب والتخربيق

نزل من ذاك لمقام ماشي وراثة

راك غ ولد الشعب ل تقلبتي عليه يا تاتا

عجباتك المرسديس والفيلا ...

سي سيد الهالة ؤ ما في شلك ما في يديك

باركا عليك

عطي لفرصة للسبول التامر

فايتك في الخبرة صادق عامر

يسيق مثالك ...

وغدا بالدمع يفيضو عينيك

بالعز والغمزة جمع لبكَاج

راك ما كنت غ منجل وعجاج

عامر بهوت غ لغا ذي ؤذا ؤذيك

جمع رجليك

خلي لبلاد تزيد لقدام

سباب ضعفها حناش بحالك وأوهام

نقبوا جيب لهزيل وحياتو

صحتو ومدرستو وعشاتو

ففكر وحل ودنيك

بارك عليك

غبر ؤ كون تحشم

انتهازي شلاهبي صم

لأرض سر خضرتها شبابها ...

وانت شرفتي ...

فشد وقرك حسن ليك

بارك عليك

كنتي حطب زند لعوافي

خنت الكادح ردتي حلمو طافي

ولتي لقمان وانت كركاعة خاوية

وزعامة ما توتيك

بارك عليك