14 مارس 2023
زريعة فرنسا
زريعة فرنسا
ولفت الذل والفابور والعفسة
من بكري خانت لبلاد
باعت لخضر واليابس ولعباد
بقات ضد النور ضرسة
بالحضارة المايعة لقحوها
ؤ حيت ذليلة من جلدها لقموها
ولات عميلة ...
سرطان وسوسة
بكل إخلاص طبقت الاجندات
كمشت على كلشي ؤ دارت الشركات
خطف ؤ هرب والرابح بوصيحة
زريعة فرنسا
رضعت من ثدي لغدر ؤ بغات فينا تحكم
نشرت لجهل ولفقر ؤ من لأراضي تجمع وتلم
خانت الله والوطن ...
ؤ قلوبها عادت حجر وسلعة مفلسة
بغاتنا نعودو فرنكفونيين
نفرطو في الأصل الاخلاق والدين
نتبعوا المثليين ؤ نداسوا بالرجلين
بل تعطيهم خيراتنا...
ونموتو حنا بالفقسة
لعبت بالحقوق والمساواة
فسدت لبلاد ؤ زرعت لويلات
دارت لحناك وربات الطحشة
زريعة فرنسا
ما بغات خير للبلاد ولا حرية
تابعين ؤدايمن تحت لوصية
ما زرعت ؤ م حصدت غلة ...
الاستهلاكية والجهل حكمة سمع ورسا
زريعة فرنسا
تكشف مكنونها ؤ تفضحات ليها الخاصرة
فضحها الله والقاطرة دايخة سائرة
نبح نبح ؤذاك الحمار راب ؤرشا
الا خالفتيها تسميك عبد عياش
صيادين لبلا طبعهم سنطيحة وتفياش
استقواو ب لعدو ؤ درسوا الحق درسة
زريعة فرنسا
نخاف من شوكها يفقي عيون الفرحة
بالزر والهر يشغلوهم في القلب قرحة
قطع ذيل ذيك الحرابي ...
راها بغاتنا مشتين حلاسة
زريعة فرنسا
الأديب والشاعر المغربي الأستاذ أحمد الكندودي
القصيدة السابقة
عروسة البلابلالقصيدة اللاحقة
الماسوني الكاذب14 مارس 2023