15 مارس 2022
زجاية تحت عنوان :
الكُلاب
قالوا زمان...
الكلاب غ حديدة م يحس بألم ناسو
نتف هيتف ؤشتف دينو
لحال طغى ؤ تخلط زينو
ؤزاد قهر لمسكين ؤتفنن في ترياشو
الزيادة من راس لهبيل ي لهبيل
ل عاد محجر ؤ ب لبهوت يسيل
زاد المهموم غمة ؤخمدت أنفاسو
لحقرة ؤ لفتات طعام لمسكين
ؤفي التلفة صبح راكب عايش ؤ ينين
الخبز الحافي ؤفي الشياطة تغماسو
زيد زيد ؤتقيب الجيب
العطفة على لعديم الله يجيب
عادت لغة جَوع هناه ...
ؤلحظ زاد تكماشو
لحيرة سكنات الكاعة
ؤدرسة نهباتها ذيك رباعة
م خلاو غ تبن ؤزلط مضى من ماسو
بينك وهم ناس مسافة ي لخويل
خطف خطف نهار ؤليل
ؤ باقي م شبع اش هاذ لخليقة ...
وخا همة بلباسو
ؤم نت يا لفياقة غير ضرير
دينك دهن السير يسير
جمعت القوة والمال ؤحرمتي الحر من نعاسو
سير لهلا يردك
دار لورثة خربت وعدك
كلاب لكرنة بالجهالة ؤلمرارة....
داسو حقو ؤمن لخردة حلوا لباسو
قالوا زمان
الكلاب غ حديدة م يحس بألم ناسو
الأديب والشاعر المغربي الأستاذ أحمد الكندودي
القصيدة السابقة
دمعةالقصيدة اللاحقة
زهرة الليلك15 مارس 2022