The Poet's Courtyard

يا بنادم دير لفمك لجام...

نقص من القيل والاتهام باطل

راه في عرض الناس ولى منشار...

طالع نازل واكل

لي ما يخصك لا تدخل فيه

راه عينيك على العيب تقلب عليه

لسانك مشوك وقاتل

مالك مهتم باخبار الناس

بلاك الخناس والوسواس

وانت في عيوبك حاصل

من لم يمسك علاش تؤديه

التقار والوقار عطيه ليه

وفي سير الناس لا تغازل

احسب خمسة وتكمش

مالك ما تتحشم ما ترمش

مرة ملاك ..مرة حنش

شوف سمك فين واصل

نهار وليل في الناس تهضر

كاين لبيه تتهتر..واش.مرضك في الخاطر

داير فيها طاهر وعنتر

سيد الرجال زعما كامل

سمع انا نقول ليك

التبركيك ما عندو ما يزيد فيك

عقلك صغير جاهل

تزيد وتنقص في اخبار الناس

تلبسهم بلا مقاس

شي تضحك في وجهو...شي طعنو بالمناجل

شوف في المرايا راك مريض

الخبث في صدرك واسع عريض

حتى وليتي قليل المروة سافل

يا بنادم عايش في الفياش

تمضغ في اعراض الناس

باز اصاحبي...داير فيها محترم فاضل

عايش بالمكر والنفاق

ربطة العنق والبدلة والزواق

تدعي انك احسن من سواك

رزين ممتبث عاقل

الصراحة انا نقولها ليك

الرجلة افعال وبزاف عليك

تحفر لهذا...تقبر ديك

وعلى الاشراف تتطاول

نوض اصاحبي وخمم

ربما بنادم من لسانك يسلم

ديها في عيوبك...راك فيها حاصل

يا بنادم ....

فكر أنك واحد النهار راحل

غادي تحاسب وتسائل

قالوا ناس زمان:صفي تشرب يا إنسان

لو كان الشرينفع ...لقالوا ليك واصل

يا بنادم دير لفمك لجام

تحرر من القيل والقال

راه عاد منشار

في اعراض الناس طالع نازل واكل

يا بنادم