The Poet's Courtyard

تقلبات لموازين

زمان ب الصهدة سوك وب لحموم كحل

تقلبت فيه الأحوال ، ؤ مالت الموازين

مول لعقل عاش متعوس ، فتلف وهبل

ولاو يقولوا عليه : معدوم ذاك لمسكين

خرج عليه نضجو ؤ بين لأنياب حصل

عْمَر قلبو هَمْ وغم ، وقصارو ليه ليدين

ضاق به لحال ،وفِ الزحمة غرق ؤ وحل

ما عاد يسمع حكمة ، ولا كلام نقي زين

عاد الكَركَاع .الخاوي فيه ساروت و قفل

لمبادئ مسخرة ،ولود أضحوكة و مواويل

مول لمعقول جراتو لحملة ؤعاش مهمل

التلفة ولغفلة ولقلب جريح مكلوم حزين

هذا زمان واش من زمان مرهط مبهدل

فيه مول لقصبة رجع فارس وبكات لعين

كلها وكيالو ، ولحصاد ب لمنشار والمنجل

غبر مول لقلم ، وبات لكراس شاكي ينين

خانتو لوقت والشاطر لًم الريال وترجل

رد الخلق لحاس ؛ ف فقد عزتو بالتكلبين

في كلام الحكمة ساد ودنيه كَاع ما يْقَفًل

عجبو زمانو ، وخى بالصهدة موسخ نثين

ضاع فيه النقي ، وبين دروب الشر تبهدل

ماتت ذيك الطيبة ، وتلفات ذيك لعناوين

بنادم رد غطاه همو ووسادو حجرة ومسل

تخلطات عليه لغمة ؤ سوقو عج بالثعابين

بل عاد فيه مول السنطيحة العقد والحل

والفاهم مليوح ، منسي على الرف سنين

بل قل مضرور فقير عديم ونورو ما طل

لمجامر زاندة ، ولجهل عندهم ملة ودين

فقس بيض رزوزية خبث وبغض و دغل

وحيت دوار قساح لقلب ، وعمر تشيطين

راد غ لخاوي ولمخ لمثقوب لحافي لمعطل

لِهرس لأقلام ،فالحرف شراه معتوه سمين

حمل لواد ؤجر معاه الجمل وما كان يحمل

ولى لخير خارج لموضة، وتلقبت الموازين