7 يناير 2023
تْقاد
لا تقول....
قطعت لواد
ؤ نشفو رجلية
راسي اراسي ضمًاد
يخفي فيك النقص والدونية
ؤ نت جملتي الخش ؤ لعواد
ما صفيتي ما تبعتي وصية
ما عقلك بالحكمة جاد
ولا زرعتي الخير بالنية
فين ذيك لمحبة ولوداد
فين ذاك بنادم ل كلو حنية
غافل ؤ تناسى لعباد
عاد منشار ؤ جنوية
قطع لاوصال ؤ غاث عناد
فرق الجمع ؤعاد الصبح عشية
لا تقول
انا عنتر ؤقاد
او تناسى مدبر الأمر ؤ لعطية
صفي فعالك كون ولد لجواد
عنداك تغر ؤ تلبسك الأنانية
تدير بحال شي ناس غ لخواد
تبع راسي يا راسي ؤ طبع البهيمية
قضي صوالحك ؤ صوالح لعباد
مسح دمعة خوك ...
لا تكون عليه ثقل ؤ قضية
عنداك من بلية الخطافة والفُسًاد
لسرقوا الغلة وولاد القوم المعمية
فلا تقول...
أصاحبي
انا قطعت لواد
ندير لي بغيت ؤ حاجتي مقضية
رد بالك فالزمان جلاد
يهبطك للصفر ؤ تبات في الدونية
فبلاما تفوح ؤ تقول انا سيد السياد
هبط ؤخاف الله القادر عليك ؤعلي
تقاد اصاحبي تقاد
تواضع ؤدير الخير في الناس والنية
الأديب والشاعر المغربي الأستاذ أحمد الكندودي
القصيدة السابقة
العشق الأبديالقصيدة اللاحقة
احببتك7 يناير 2023