The Poet's Courtyard

صحاب لفلوس

صحاب لفلوس

عاد كلامهم مسوس

الهزان والتفرعين وبخ

جمع ولم كلشي بليكي والشح

البروتوكول الخاوي ولفشوش

تبيخا موضة والنفاق جاوي

زعما لحديدة ولفيلا وهما بالغش وتلاوي

ردوا الود دفلى وسعرو فلوس

هما صحاب التشتات والمتاعب

لمنكرات ولوقاحة ولغرايب

لا اخلاق لا تربية...

ؤ راس مالهم تعنفير خلق مهووس

ما طلوا على ماضي وما حفروا

مغيبين باش نساو فين كبروا

بواتهم سرقوا ونهبوا الزيتون والكرموس

باش كانوا الرجال في النار والكاعة

ضد المحتل يضحيوا تباعا

كانوا هما خونة غشاشة ماضيين موس

جمعوا لحصيصة وتاجروا في بنادم

زادوه غمة وهو شريق يكدح ويقاوم

تلطخ مالهم بالسحت وبلحرام مرشوش

مخلوق كابر مغشوش

لخطفة والتبييض المكر ولقهر

عجبهم حالهم ؤعطاو لود بالظهر

جوعوا ولاد السبوعة...

وورثوا لسلالتهم الهرفة والدوس

كان عرقهم محبوس

بين ضعف لحال والحالة

اليوم داروا الريال عادوا عالة

صبحوا في طريق الفرح...

سيف مغروس

صحاب لفلوس

سلبتهم الانانية والدنيا

نساو انها خداعة فانية

منها ما خذاو عبرة ..

وما خذاو دروس

على الربح جوعوا لفقير

ردوا خبزو حافي فطير

وبغلاهم قهروا لكبير وصغير

مات فيهم الحس ...

وبالقسوة جوفهم مدسوس

بل في تقديرهم بنادم سلعة

رخيص ما يسوى قنينة جرعة

خالوا بريالهم وصلوا ...

وهم غارقين ف لكذوب والبوس

صحاب لفلوس

ما يعشقوا ما يحبوا

كلشي بثمان باغيين غ يتسلاو ويلعبوا

استغلوا لهزيل ؤلظهرو بردعو

حيت ناقصين قلال لعفة والقلب منكَوس

صحاب لفلوس

بغاو يعيشوا وحدهم ؤ وسعوا الطبقية

ما راضيين بكادحين عقد ومرضية

ما ملكوا طبع لمسلمين...

ولا نصارى ولا مجوس

صحاب لفلوس