The Poet's Courtyard

رَاجْ

رَاجْ...

في جمهورية الغبرة ولَعْجاجْ

صَنْدَلِستان بْغاوْ يْبَيْنوا الكُراجْ

لكن شتًاتْ قُطْعانْهُم الدْرونْ

فَيْقَتْهُمْ مَنْ الغفلة والظنون

ؤُ تَلْفاتْ لِيهِم العُشًة هِي الميراج

لا تْقَرْقِير بقى ولا سَنْطيحة

بْنادِمْ غ مَجْلِي ؤُ طاحْ طِيحَة

ؤ لِي كانوا دافعين كبير بالقُرْنابي

عادوا نْموسة وضبوعة وَدْجاج

راجْ

أنً في جمهورية الغبرة و لعجاج

بوصْبَعْ فيها هو لَمْقَدًمْ ؤ لْحاكِم

عدو قبيح ذميم للأجندات خادم

حاكماه لالاًهْ الرومية

ؤُ لَ مَ نَفًدْ الأوامر صاغِر ...

يخوي ؤ يجمع الباكَاج

جْهالة رَدًتْ تلك الجُورَة ولمحبة ضْرورًة

دارِت لَعْصا في رْويضَة شوكة محفورة

بلا بْلا ولْهَضرة ...

أعْصابْ و فَقْسة وَتَشْناجْ

زَعْمُوا أنًهم أهل لْجِهادْ وَلَمْرَوًة

وهم صْحابْ الفرقة ؤمن ذيك السًرْوَة

الناس جَمْعَتْ حالْها ،ؤُحالْهُم زايِد يَعْواج

قال ليك هَمْهُمْ الحرية وتقرير المصير

فما داروا طايْلَة الفقر والجوع وَلَحْصِير

التْشَلْهيب والنفاق والاشاعة ماكياج

راجْ

انً شي عْدو مَنْ لَبْعيد هَدًدْ بلادي

قالك احرار ،وهم عواصف وَرْعادي

هَدْموا الأمة بالخرافة ولكذوب ؤُ لَعْجَاج

خربوا سوريا واليمن وزادوا لفرات

عايشين ف لوهم ؤلبلاد قسموها فْتاتْ

عصابة الغل والشوهة ، التطفل ولَعْواج

راجْ

انً جَحْش من ابواق العصابة سبْ كْبادي

جامي يْقيسْ بِلْغاه ْ سُمْعَة بْناتْ بْلادي

جيفة هذاك البغل ، راه غادي ؤغادي

جاهل ؤُبينُو والرجلة الف بحور ؤ مْواج

يا لْحُثالة بْناتْ العز هادوك ساسِي وعْمادي

بالعلم والتمدن ولحداقة بهن يْطيب نشادي

لغة أرًا زِيد لِ وَلًفتي....

ؤُ مُخًك خاصو الكوداجْ

فاسمع يا راس الكدية البحر عليك هاج

في قبة الامم عادْ لْحَق ضاوى وهًاج

فيه علنو ان الحفلة سلات والدوبلاج

الصحراء المغربية في مغربها حرة

ؤغدا سبتة ومليلية ترجع وتنتهي الجرة

فَنقًزْ يا بوصْبَع ...

ؤ أنْتَ يا صندلستان ديكاجْ

راج