8 دجنبر 2019
مقهى الرجراجي
ي الرجراجي...
جيب نص نص بعقلها ...
ؤعاد أجي
ما بغيت منك أتاي
برادك مصدي فمو دوًاي
كيسانك موسخين همجي
صينتك كحلا عيانة
ما مغسولة هاذي سيمانا
راكب على حمارك عواجي
لخنز راس مالك
دافع كبير ي ودي مالك
سير تعلم دير نص نص ؤعاد أجي
وليتي مفضوح قدام لكليان
ؤ حلفت م تعيق أنك غشاش عيان
داير فيها زعيم واعر ؤلقمان
داير سيبة ؤ من لحساب ناجي
مكبوت مريض متبوع بالنعلات
ثرثار خاوي ريوكو هابطة فرات
مرسول حب ؤ لمحاجي
ي الرجراجي...
إما صايب شي نص نص زوينة
أو بعد شي نهار تولي قضيتك روينة
ؤ أنا تسونامي نخاف يقهرك عجاجي
م دير رتور م تقسح م تزور
حلل ريالك راك قبيح مقصدر
دابا يصيدك شي كليان عصبي مِزاجي
يعلمك كيف تخدم ؤ تعصر
دسارتك كولها راك م غادي تعمر
ؤ ف الاخير تلاح قهوتك في لمراجي
تولي شياطة ؤ متنفعك عياقة
يهربوا لكليان ؤ يْديع عليك...
حر مُقْراجي
تغرق في تَخْت القهوة البايرة
سلعتك ف السوق خاوية سايرة
م فيك نفع غير المغص العاجي
ي الرجراجي...
سير حتى توعى ؤتعلم ؤتكبر
تبلغ حكمة الشيبة لمضوية بالحكمة ؤ صبر.
ؤعند لكليان ؤ لعشاقة عاد أجي
يالرجراجي....
الأديب والشاعر المغربي الأستاذ أحمد الكندودي
القصيدة السابقة
إلى متى ؟؟؟القصيدة اللاحقة
ْوْجَه الطَرًاح8 دجنبر 2019