The Poet's Courtyard

حط راسك فين تلقاه

حط راسك فين تلقاه

ؤبين الريوس ما ديرو

فكل راس يغني بَغناه

ما تدخل زحمة ولا رحابي

ما تقول شلة هما صحابي

كلها ورايو ؤكلها شاد عصاه

غادي معاك ؤ منك حاضي

يتسنى الغفلة يشبع فيك عضاضي

يزيدك ألم بِسمومو شرو والآه

ما تَرْخي وْدَن لا تكون سْمِميع

قرا لكلام قْبَل فيه غ خضرة الربيع

الراس لما يدور كُدية ؤ شحال مكَواه

فدير راسك فين تْصيبو

رفقة الخير ما تْضُرو ما تعيبو

دير الخير في الخلق ؤشد بالله

بنادم يا صاحبي حجر وطوب

ها الصادق ها لَمْراهق ها المزغوب

غربل ؤ لي تْخَلوض لواد داه

ما تَتْصنع في الفعل ؤ ما تخنع

الفضل رحمة ماشي بتقطير الشمع

لعزة تاج وصفا ونقا محلاه

دير راسك فين تلقاه

ما تلون ما تقلب فيستة

تقضي مجحوم قجاك السينتة

توكل على الخالق لا سواه

النمام ولكذاب ومول لبهوت خسرت سلعتو

لمنافق ولبخيل وَذْليل لمشموت فوتو

لا تديرو عشير لا تلقاه

اما مول سبع وجوه رد منو البال

لا تصدقو راه زاحف على بطنو بدال

شوف لأخيار وسبول لحاني في عطاه

ؤ زمان قالوا لي غداك باللبن هناك

شد في المربط فما كاين لذا لذاك

حب راسك ؤ تهلا ؤ ديرو فين تلقاه

حط راسك فين تلقاه

وبين الريوس لا تديرو

فكل راس يلغي بلغاه