The Poet's Courtyard

ذيك الضحكة

ذيك الضحكة

سوكت بالغم ولغبينة

ؤ ذيك لوجنة لموردة

ذبلها ظلام لوقت...

ؤ تخلوضت ميهت لعوينة

راحة لقلب رابت ؤتسوست

قسوة لحال ف لفرح دارت روينة

يا امي يا حنة و يا لحنينة

شكايا خْمَر ؤطال....

ؤحماضت هي لعجينة

حلف شوك لغيوم حتى يشتف

يذبح نور لهنا ولجذور ينتف

تقن شغلو

لاحنا في قعرو

ؤ من الحس النقي سالينا

ضاقت الروح

في الحيرة لعقل مليوح

ؤ بالمتجل حش حضرة الجنينة

ذيك الطيبة عادت علة

لوفا كساوه بشطايط الصهدة

والصفا ختم عليه النكير ؤ بلا

عادت ريحة الياسمين عفنة نثينة

فلا تبكي يا عيني فدموعك غاليين

يكفيك حظك لمايل هاذي سنين

جمرة لحال كوات لحرف ...

ؤ من سموم لعقارب تسقينا

عاد الداخل بالحسرة ينين

ؤعادت عروش لقب سقيمة

حان وقت لبعاد والصبر من الزحمة طج

ختار الوحدة فوساع الفج

زربو على السعد بالسلاسل ...

ؤ ثقلوا عليه بالضغينة

ؤ ذيك البسمة لي كانت تشوات

عادت فاخرة ؤ ولًا رمادها يكحل عينينا

ذيك الضحكة مشات م رجعت

صدت صدة وحدة ؤ ف غمها غرقت

ؤ بين قضبان ليأس باتت سجينة

ذيك الضحكة...

على الشفايف م طلت

هاجرت عشها ؤ م رجعت

ؤ غربان لوقت كملوا علينا

ذيك الضحكة..؟