The Poet's Courtyard

ذياب الآه

هما ذياب الاه

تجمعوا خذاو قرار

ؤكلها ؤ فين جلاوه

هذا كادح ؤ يظال كادح

بالقنعة والسكات زعما مرضي صالح

داروا به الطنازة وتلفوا خطاه

لاخر في لقهاوي داير الضجة

غواتو يصدح ؤ يقلبها دبزة

حيت بالمباريات وتيك توك بلاوه

ولاخر كان زعما صنديد

ولد لوطن ما يدير عيب

لقحوه ؤ باع مو مع باه

والاخر بقناعو شيخ تقي

وهو غاطس في لحرام ؤ غ يقاقي

باع همتو دينو والتاجر شراه

عادت سلعتو مضروبة

لكناوية ولالا لمجذوبة

وكلها باش بلاوه

لاخر لقى اللذة في حنزز

وكال لحم خوه وخا مكنزز

المهم يشفي علتو وراسو كفاه

عايش خارج التغطية

بالتلاوي والتبوحيط والدونية

ما عاد يحشم ما خاف الله

لاخرى بلاوها بالمسلسلات

التعرية حتى صورة الانوثة مشات

تلفوها بالفردية والتعدية ...

رخاصت ولجثة مطروحة عدمية

والعرض خمج وذياب لغابة شراوه

اما بنت ؤ ولد العشرة فيها لا تسول

علموهم ان الأخلاق نقص وعلى نفسك عول

ما عاد راضي لا بدينو والواد داه

ؤ ذيك أم المستقبل لعليها تعول

هرسات الكلة ؤهانها مبغل

تشتت شقفها ...

ؤشي هانو ؤ شي رماه

ؤ هما ذياب لغابة والاه

قلبوا لبنادم لموري

عاد المعقول مسلول صوري

تبيخا والسبول الثامر ...

بين ضراسهم مكواه

كلشي زرعوا فيه السوس والدغل

الشك والخوف لفضيحة والذل

بنادم ركب لكلخة

تملص وطج هجر العش ونساه

فيا بلادي اش طرا لاولادك

قتلتهم الانا وميزانهم هالك

نساو الخير والنقا ؤ تلفهم الله

ذياب الآه