The Poet's Courtyard

يا بنت الناس

يا بنت الناس

علاش هاذ جر وجرر علاش

والحل كان ايلا ما تفهمناش

قيسي قبل ما تختاري

ثبتي ؤفوتي لمزاح ولعب الدراري

ؤ ل دار راسو في النخالة...

يريشوه الديوكة ترياش

الناس حجر وطوب

ها الصادق ها النقي ها المرعوب

ؤ ربي كرم عبادو بالراحة ...

باش فرق لعقل والراس

في المعقول ما كاين بو حشومة

شي يكمل شي بلا غدر بلا لومة

دار السكينة والرحمة تاج ولباس

تبعتي لخوى ولخاوي

مع ولاد الأصل ما تنفعك تلاوي

صحاب لقلوب الصادقة...

ل ما ساكنها نقص او باس

عدتي غمة ووسواس

حيت قليلة النية حدية

كلشي عندك تلعيب عقلية يهيمية

زعما وحدك الفايقة ...

و سفينتك غارقة في لهزان وتفياش

تحضرتي كثر من الحضارة

في التحراميات اكثر من المجوس والنصارى

عجبك حالك ...

لا حاضي لا عياس

بعد هما شدو في الحشمة ؤ ووراوك لعربون

دينهم صدق ولوفا وفي عهدو ما يخون

اختار صدق الفعل والاحساس

يا بنت الناس

ما كلفك حد باش تبغيه وتراوغي

دين الله حرم لغة بزز وتلاوي الباغي

ؤمولات سبع قلوب...

باغية التشلهيب لحفاري والكاس

ؤ ل ما عجبو ...

يتلاح راه قديم ما يسواش

فلا تعيشي مكروهة ومنك لهوى فاض

ريحة الحيرة منك عطات وتشنشيطها زاد

كلها وطريقو ...

بلا صداع بلا فريع الراس

عيشي وتفيشي غ خوي دربي

نقي مع الله والضربة ايلا ما ضرت تقوي

اش دانا نمشطو لقرع راسو ...

ؤ ل ل دار الذنب غدا يدفع لخلاص

يا بنت الناس

كل زرع وكيالو

خلطتي الصفا بالخبث ؤ ظلام حالو

سكنك لبهوت ...

وحفر في ضلوعك الف ساس وخناس

فخلي عليك الريحان وحدو يترنح

وخا الشوك ما يذبال وردو ما يتقرح

ؤ ل باعك بيعو...

ؤ رفسو بهجرك ترفاس

يا بنت الناس