The Poet's Courtyard

ولد توبقال والنخل

يا المغربي

يا ولد توبقال والأطلس والنخل

راك محسود على بلادك

كلاب الكرنة حاضيين بابك

ؤ جيرانك نيتهم تشتيت الشمل

سنين حفروا شحال من حفاري

سَوْقوا شرهم ؤ طفاو نواري

خيًب ربي ظنهم ؤ خفاف لحمل

يا لمغربي صفي قلبك مع خاك

مْحي لغة هذا وذا وذاك

شطب القلب من الضغينة و الدغل

ولاد المغرب راهم وحدة كاملين

الخير طريقهم ؤ فيه غاديين

ؤ ل خان غطاتو اللعنة و الزبل

رجع لطبايع جدادك والعهد صونو

راهم بغاوها افتراس والضعيف ربي عونو

يزرعو الفرقة ؤ الفرحة تذبل

لا تنسى راك ولد التاريخ والحضارة

ممنوع الخنوع للعملاء والشفارة

ل جهلو بنادم ؤ ردوه سطل

طاروا على لوزيعة ؤ قسموها

نهب نهب ؤ حتى لبهيمة جوعوها

بغاو بنادم مشتت جاهل هبل

السلطة افيون ؤ هما تبلاو بها

لا ملة لا دين ؤ لعداوة راضعينها

بغاو لخلق متوحش يتْعاضْ ؤ يركل

فآه يا المغربي فهم وترجل

عديان بلادك كثار

ؤ معاك شحال من خوًان ثرثار

يبيعك للعدو ؤعليك م يعقل

فمد يديك لخوك ؤ جمع الشمل

لمغاربة من طنجة لكويرة خوت

يد وحدة ؤ ل حسدهم يتحرق ؤ يموت

ؤ دعاة الفرقة م جناو غ الشوهة والذل

كن لي بغيتي ؤ م تضر خوك

صافي نقي واحذر فضايحهم يجلخوك

راه م يخلع لعدى غير لفياقة

النضج والوعي وتوحيد الشمل

يا المغربي

يا ولد توبقال والأطلس والنخل