The Poet's Courtyard

شامة

ي شامة كَولي مالك ...

ؤ جاوبي لحكيم سائل

م بقا عجبني حالك ...

ؤ حال هاذ اللحظ الجافل

بلابلا عليك كثرات

شلة هدرة واتهامات

و أنك ب جاوي دوخت الراجل

حتى عاد كركوز ساهل

ي شامة قولي الحقيقة

زمان الاتهام هذا والضيقة

فيه هبطت سومة الصفا...

ؤ صبح ميزان لوفا مايل

قالوا ف زواق تشغل بالك

ؤ ذاك طبع قبيح ؤم هو ديالك

قالوا رفيق الدرب صبح منبوذ

غرقتيه في صباغة ؤ لكذوب

ؤ رديتي لحق نكران ؤ باطل

قالوا بغيتي تعيشي الفردية

لا قيم ؤ لا دين ؤ لا درية

ربي ليك عوين إل كان هذا حاصل

ي شامة نْتِ راس التنمية

عْمارِتْ لبلاد و لحنان و لحنية

القيل والقال عجاجة المخ الغامل

قالت :سمع مني أسي لحكيم

مأصلة أنا ؤ عرقي كريم

ذوك الناس راهم شط بلا ساحل

سير رتاح ؤ تهنا ب لمرة

م نفوت ديني م تسلبني نبرة

صفا ؤ لمحبة راس مالي...

ؤ صداع راه حتى ف لمصران حاصل

أنا ي سيدي لحكيم همي نحيا ؤ نسعد

م بغيت ياقوت م بغيت زمرد

نفس لمقام بلا تمييز بلا دوز حيد

م نتمس م نتحقر ؤم نتمرمد

فأنا ي سي لحكيم

مرة ظالمة ؤ مرة مظلومة

زمان ؤ لوقت ل ذميم

ؤ هادي لحقيقة المعلومة

ؤ منطيح على حد باطل

يكفيني لوقر و لإخلاص ...

ؤ رفيق رزين يكون الساس

به تزيان عنايتي ...

ؤ دعاة الغفلة ....

يتلاحوا ف لمزابل