The Poet's Courtyard

رضات لوالدين

تهلا ؤتهلا مليح

في ذيك لميمة ...

ؤذاك البو ل صبح عاجز شيخ

منهم الربح والخسران

بالطيبة احسن اليهم يا فلان

ؤعنداك من دموع الحقرة...

من خدهم تسيل وتسيح

هما لوالدين

ذوك ل تعبو عليك وشقاو سنين

ضيعوا شبابهم ؤكدحوا

ما ملوا ما نهروك بكل شيء ضحوا

سقاوك لمحبة والقلب سميح

تهلا

في لي عليك سهرت وتعبات

في نصايص الليل رَرات بك وقسات

اليوم راها عيات والصحة مشات

لا عوينات لا جهد ولفرحة ذبلات

احذر من غضب الله ...

وفي سخطهم عنداك تطيح

او تقهرهم حيت تبدل حالك

تجازيهم بالنكران باش علا مقامك

تسلط عليهم شي حدية ؤمنهم تعصر لقيح

شحال من ميمة عادت مجرورة

فرطوا فيها لولاد حزينة مقهورة

ما رحمتها كنة ...

ؤ زادتها ألم ونطيح

ذيك الهمة بسخطك راك فقدتيها

كيما درتي يدار ليك كما نستيها

فتسنى يا لي لاح لوالدين تلاويح

حتى ولادك غدا يلحوك ؤ يخلوك

ما رحمتي امهم لالاهم يحقروك ويهملوك

في الملجأ نهايتك ...

نكرة منبوذ ذبيح

تهلا

دعاوي لبلا لا تأخذوا عبرة

ما هو بنادم ما هو قدوة

ؤ ما يستاهل غ السليخ

ذاك عاصي ظالم سادي

ل عض البزولة متلفاه الدعاوي

عاق بالكَرانتي فيتسنى نوبتو...

غدا يتبدل لحال ؤ يذوق التجلويح

بين الناس هز بيهم وافتخر

ما يغريك مظهر وفي الرضا لا تقامر

منهم طلب السماحة

لا تخليهم لوحدة حْلاسة سلاخة

راك ما تجني غ ما زرعتي ...

فعنداك شوكهم والشيح

تهلا..

في لميمة والبو لحنين

علم ولادك الصفا ولمحبة واللين

لا تقلب ليهم على ألف سبة وتجريح

يْوَليو شياطة وتلعب بهم وحدة عيانة

ترد عيشتهم كحلة مرارة

بل تسوك ليهم ب لحموم ولخسارة

تمثل عليهم دور طرزانة ...

عجاجة وفي السخط تطيح

تهلا

وزيد تهلا ؤ تهلا مليح

في ذيك لميمة...

وذاك البو ل عاد عاجز شيخ

رضات لوالدين حجاب ورباح وعناية

رد الصرف وانت راضي واتبع لوصاية

ديرهم ف عينيك ؤحتى انت راري...

تنقى طريقك من كل شوك وحصادك رضا ومديح

تهلا