The Poet's Courtyard

قلة الترابي

قلة الترابي

زريعة بايرة

في الوهم راكبة القصبة حايرة

لسان طويل...

والذراع كَاضي

قلة الترابي

فرخت ماركة بريمي

ما فاهمة لا كِ تحس لا كِ تدوي

كبر شوكها بين الدروبة...

ؤوسخت ارضي وترابي

طارت الحشمة

لوقر ولوفا والصدق مشا

البيض فقس خماج وعاهة...

والراعي غارق في لالة ؤ مالي

عادت الزنقة حضن

لذاك المهمول وسط لعفن

حتى ذاك لِ ولدو ما صاحبو..

ما عاشرو ؤ عليه ما حن

تايه في لحفرة ...

مرفوع منتوف ؤ ما ركب عقابي

من لكبار ما نضجو لولاد

فعالهم ذميمة خيمة بلا اوتاد

تنصل الدوني من المسؤولية ...

ولكبدة عاد سوقها خاوي

قلة الترابي

لفشوش ؤ ولد ؤطلق

لبلاد غادية ف لمستفهم والحلم غرق

لا اسرة لا مدرسة ربات ...

ضاعوا لولاد وانحرفوا بالعلالي

آش طرا واش طاري

فرطنا في لخير ولمعقول

ما جنينا غ الشوك ؤالداخل معلول

ما بنينا ركايز وكلشي بالتفاهة مشغول ...

الا في الرزانة فهو جامع ؤ طاوي

قلة الترابي