The Poet's Courtyard

لا تلعن

لا تلعن

دين ولا والدين

لجم لسانك

كون قدوة وتعقل

بل كون المربط والراعي وترجل

احترم نفسك ؤ حل ذوك لودنين

بل قاد برزانة دلقوشك يا مسكين

الكلمة الطيبة تنقيك ...

تطهر كشوشك من كل جهل

اش خلتي للخلف ما يدير

وانت السلف طبعك زيرو شرير

مقلوبة عليك لقفة ...

ؤ ربي هملك وسد عليك باب اليقين

خلاك في هواك تلالي

حتى لغاك صبح باسل ؤ بالعلالي

لا رفق لا نقا عيان بالمجمل

ظنتيها مزية

هي الوحشية وطلق السلوكَية

اهدر ما منعك حد...

غ يكون كلامك حلو وبنين

ما فيه لعنة ولا مطارق

لا شتم لا ذم وحسب الفارق

في ايامك وعمرك والسنين

فما لك باقي برهوش

ما كاين غ دين باه دين مو حْياه مخدوش

عقلية فرخ والقلدة منفوخ سمين

ما تلعن

ترزن ولجم وغربل

زعما منك نتعلموا لأخلاق والحشمة

ساعة الخايبة هي ل على فمك والغمة

لقهقهة وابغض الاصوات مخلوق نثين

حلف ايلا فاق

جلخ بلغاه لعرسة زعما واعر ؤحداق

وهو في جهالتو عمى...

يلعن في الناس بلا فرامل مسكين

فبالله غ قول فين مربي

لا زين لا وقر موسخ دربي

دعاوي لبلا ولوالدين

هي لغة الزنقة زندقة

تفقدك قدرك وتطير البراكة

تردك قزم ويلعنوك لعينين

فاش هاذ الزمان المارج اللعين

بنادم فيه توحش وفقد البصيرة

عايش في سبني نسبك والتنوعيرة

ولقبح مطبوع على لقلب والجبين

دين مك دين باك خذاها طبع وموضة

كلام السوق كثير والسلعة معروضة

ما وقرو الله ولا دينو ...

ؤ ما وقرو لوالدين

ما تلعن

ؤ لِ زرع العافية يجني رمادها

ما رحم ما يترحم هدم الحشمة وسد بابها

خسر بتصنديلو السبول ...

ؤما بقات محبة والجهل عمى ليه لعينين

فنوض يا غافل ربي حفادك

على الكلمة الطيبة بها تلقى حسابك

زرع ذرية صالحة ب لحشمة ولوقر ...

ؤ ما تلعن دين ولا والدين