The Poet's Courtyard

لا تجامل أحَدْ

على حساب فرحتك قاد لْحد

ما تزين خاطر لِ مْرَون مسالي

موزيط ثقيل ب لالة ؤ مالي

ؤ ما تجامل لا حادة ولا حد

عول على الصدمة في زمان الغمة

تقدر تهزك الصورة وتزيدك صهدة

فقاد ميزانك عض فيه ؤ شد

عول على االعالي يعطيك من فضلو

غدا تحاسبك نفسك فالصبر تعدى ثقلو

ما يبغيك تعاني...

ولا مربوط بالحيرة ولعمر غارق نكد

لي ما بغاك ما تبغيه

شيبة لعاصية لا ترافقيه

مسح قبيح الطبع ...

كل رخيص رمانة مغمض

فْلي بنادم عاد منحو لامان

غربل فعالو واحذر يا فلان

يبان لك اليوم ملاك وغدا ثعبان

شلاهبي طماع يبيعك بالرخا...

وانت درتيه غالي وعطرتيه بالورد

يْعَييك بكثرة لالة ؤ مالي

قلة العفة ولهزان على الخاوي

يبغيك غ هزيل رايب مهرس لاوي

سيق لوسخ من طريقك...

مْرح وتمرح افرح واسعد

هو الصادق في زمان بلق والتبهديل

داسو جرو مريض عيان عليل

لا معقول لا صفا الهدرة سوقو قال وقيل

ؤ ل واهم ما يبني ما يشيد

سكن لغدر دواخلو والجوف

ولف التعربيط نفسية حلوف

جنس قصيف ما يعرف وقر ؤ ملتو يعربد

تبرم على طريق لمنحوس وزطم

عنداك من الجايع إيلا شبع راه ما يحشم

يرد غطاك شوك...

وهْناك وسواس مطلي ظن و سهد

بل لا تفكر ولا تشكي وتألم

لا تقول فيا لعيب ف تتعس وتندم

كامل مكمول انت فَوْعى...

حْضي سواريك ولجراحك كمد

فيا لجيد ل لاحك لوحو

محي صورتو ومسح لوحو

ومن لغة طلق السلوكية بَعًد

ؤ لَ ضاق بك لحال بجهلو وقبحو

سقيه حتى انت مرار كْحل صباحو

سقيه من سمو وخليه ينبح ويكدد

عنداك تصيد

حيت نقي ؤ ولد الناس

يلبسوك الشمايت تعود خماس

شغال بالزر ...

وفي الشر والدغل مقيد

بل ما ترضي حد على حساب فرحتك ...

وتقضي انت تعيس مْنكًد

مْرح وافرح وتمرح

قتل عدوك بالضحكة وصحصح

دير لوفا غطاك...

وخوذ النخوة فراش ومركَد

بل تبرم على اللهطة والشوك

دير راسك صديق راسو وهو خوك

ؤ ما ترضي على حساب فرحتك...

لا حادة ولا حد

فلا تجامل لمضروبة فعالو...

منو اطلب السلامة تالفة حوالو

وعلى روينتو وجهالتو بَعًد

لا تجامل حد