The Poet's Courtyard

هي لأرض...

شي سقاها بالدم...

ؤشي لوثها بالخش والخم

واحد ضحى باش تفرح

تزهر لحرية والحق يصدح

ؤ شي باعها وقدح....

ما فكر ما خمم

لقاها ساهلة والدروب متساوية

عفس عفسة رخيص كاوية

ضرباتو عواية ونفت السم

بل دار راسو من عليها جاهد

ؤ هو كان جبان خوان حاقد

ما ضحى لا بالنفس ولا ب لقلم

ذووك الاحرار هم لِ جابوا الحرية

بالكفاح هزموا ولاد فرنسا والدونية

ما جناو غلة ...

ؤ شبالهم داسها رعواني وزطم

في زمانو كان عميل وجلاخة

بركاك رخيص ملتو سخافة

دار لمال ؤ عاد فحل ؤ خصم

سادوا وركبوا العالي

حاربوا ولاد العز ولبسوهم لبالي

فقروهم ؤغاثوا فساد شم ولم

ؤ عادت لارض بزولة ؤحلبوا حتى الدم

جمعوا لحصيصة ولا من ينغزهم

صنعوا لقوانين وستروا عيبهم وفزهم

تسلطوا على لبلاد

وعاد الخاين والسفيه فينا يمرغد صم

طبق الأجندات

لا عدالة لا مساواة

زرعوا لبلاد حيرة وغم

عاد ولد المجاهد في الذل يكابد

وبات ولد الخائن فرعون نهاب حاقد

بل سقى الأرض حنظل وسم

ففين يا زمان الحصلة بنا غادي

لا تدبير لا معقول لا جدية بنادم سادي

ركب فلسفة قهر وجوع...

وبالكرباج سد لفم

وهي الارض باكية شاكية

شي سقاها ؤجاب لعز...

وشي خانها ؤبات بالنقص ينتقم

هي الأرض

فيا ذاك الرعواني فكر ؤحشم