The Poet's Courtyard

الطيحة

شحال من عمى ضرير

غناه الله

ما حمدو ما خشاه

عاد طرزان...

ؤ دفع كبير

باش يعذبو ربو غناه

امتحنوا ؤ لقاه جاحد فجلاه

طمع حتى في رزق لمعدوم...

حصيرو ؤ طعامو لفطير

ما دار خير

الصباغة والغبرة ؤ عاد غافل شرير

بل دار لعصا في رويضة

عادت التفاهة حاكمة والرويبضة

ؤ حصادهم كان محنة وصهدة وضير

نهب السهول والجبال والويدان

خلى بنادم حاير تالف جيعان

هدم المدرسة والصحة...

ولبلاد غرقت في الفقد والتعنتير

ما لقى لي يردعوا

لعساس وكلو وشبعو

عاد في الميزان يتلاعب...

وخا جاهل ركيزتو مالو لوفير

نسى ان لفضل في اللبن لا في الشكوى

تملك حتى تعيى ؤ ما تبلغ مروة

يردك خنز الدنيا من جرانو....

صداع الراس ولكذوب والتغرير

ؤ ذاك لي كان واحد نهار فقير

شبع وعاد سبع

ما عاد يحن ما يشفع

ريقو عرق لمسكين ودْمع

كلب لاهث على الريال حقير

بل نسى الحومة ولبلاد

ما بنى ما علا ما قرا ولاد

عاد من السادة ودهس لغير

الفيش والكير

لهزان والتحنكير

قلب الفيستة

غمض وحل عينيه وتحشا

ولى صمصم وابو الملايير

الدنيا في الله نساتو

كبلتو وفي ظلامها غرقاتو

ما تواضع ؤ ما حمد الله لكبير

من لعالي لاحو في الحفرة

الشوهة ولفضيحة وحك الدبرة

بهدلو الجبار ؤ رد منو قزم صغير

بل ل سرطو الجمل في لعقبة حطو

رجع للزيرو ولسنات فيه يخبطو

ذاك جزاء ل ما حمد الله ...

طغى وتجبر ؤ دفع كبير

كان ناسي انه كان مكسي بديال الناس

حيت شناق سمسار عايش بالخناس

اليوم ضربتو لفيقة مأخر..

ؤ طاح في الشبكة ؤ ما نفعو مالو ولا الغير

فتواضع يا بنادم ؤ رسا

ايلا عطاك لعاطي مسح الدمعة ؤ لا تقسا

قنع وخوذ العبرة ...

شد في الله الرزاق ...

واياك تكون فاسد نهاب ؤ شفيفير

ب لحلال تعيش السعادة

راحت البال ثمنها ما يتقاضى

فاقنع وتواضع ؤ دير لخير